దున్నేవాడిది భూమి అని నినాదం పోయి దున్నగలిగే వాడిదే భూమి అనే విధంగా వచ్చింది
- కార్పొరేట్ వ్యవసాయం వస్తే రైతు అనే పదమే లేకుండా పోతుంది
- బిజెపి ప్రభుత్వం కార్మిక రైతాంగ చట్టాలను కాల రాస్తుంది
-వ్యవసాయ కార్మికులపై ప్రభుత్వ విధానాలపై పోరాటాలు తప్పవు
తెలంగాణ వ్యవసాయ కార్మిక సంఘం సమావేశం జిల్లా కమిటీ సభ్యులు నిమ్మల వెంకన్న ఆగ్రహం వ్యక్తం చేశారు. పినపాక మండలం బయ్యారం క్రాస్ రోడ్ వద్ద ఆదివారం సిపిఎం మండల కార్యదర్శి దుబ్బా గోవర్ధన్ అధ్యక్షతన సమావేశం నిర్వహించారు ఈ సమావేశంలో నిమ్మల వెంకన్న మాట్లాడుతూ, వ్యవసాయ రంగం దేశ ఆర్థిక వ్యవస్థకు వెన్నెముక అయినప్పటికీ, రైతులు, కార్మికుల సంక్షేమంపై ప్రభుత్వాలు నిర్లక్ష్యం ప్రదర్శిస్తున్నాయని ఆరోపించారు. కనీస వేతనాల అమలులో లోపాలు, ఉపాధి హామీ పథకాలలో మార్పులు, కూలీలకు చెల్లింపుల ఆలస్యం వంటి సమస్యలు రోజురోజుకు పెరుగుతున్నాయని తెలిపారు. గ్రామీణ ప్రాంతాల్లో పని అవకాశాలు తగ్గిపోవడంతో రైతు కుటుంబాలు వలస వెళ్లాల్సిన పరిస్థితి ఏర్పడిందని ఆవేదన వ్యక్తం చేశారు.ఇటీవల వ్యవసాయంలో యంత్రాల వినియోగం పెరగడం కూడా కూలీలకు పెద్ద దెబ్బగా మారిందని వారు పేర్కొన్నారు. ట్రాక్టర్లు, హార్వెస్టర్లు వంటి యంత్రాలు విస్తృతంగా వాడడం వల్ల కూలీలపై ఆధారపడే పరిస్థితి తగ్గి, వేలాది మంది వ్యవసాయ కార్మికులు ఉపాధి కోల్పోతున్నారని తెలిపారు. ఇది గ్రామీణ ఉపాధిపై తీవ్రమైన ప్రభావం చూపుతోందని అన్నారు.అదే సమయంలో కార్పొరేట్ వ్యవసాయం పెరుగుతుండటం వల్ల చిన్న, మధ్య తరగతి రైతులు నష్టపోతున్నారని నాయకులు విమర్శించారు. పెద్ద కంపెనీలు వ్యవసాయ రంగంలోకి రావడంతో రైతులకు సరైన ధరలు దక్కక, మధ్యవర్తుల ఆధిపత్యం పెరుగుతోందని అన్నారు. దీంతో రైతులు అప్పులబారిన పడి ఆర్థికంగా కుదేలవుతున్నారని తెలిపారు. ఎరువుల ధరలు భారీగా పెరగడం రైతులపై మరింత భారంగా మారిందని, సాగు ఖర్చులు పెరిగి దిగుబడులకు సరైన ధరలు లేకపోవడంతో చిన్న, సన్నకారు రైతులు నష్టాల్లో కూరుకుపోతున్నారని ఆవేదన వ్యక్తం చేశారు. రైతు సంక్షేమం పేరుతో అమలు చేస్తున్న పథకాల ప్రయోజనాలు నిజంగా కూలీలకు, చిన్న రైతులకు అందడం లేదని విమర్శించారు.అదనంగా, వ్యవసాయ కార్మికులకు ప్రత్యేక భద్రతా పథకాలు, పెన్షన్ సౌకర్యాలు కల్పించడంలో ప్రభుత్వం విఫలమైందని ఆరోపించారు. ఆరోగ్యం, విద్య వంటి ప్రాథమిక సదుపాయాలు గ్రామీణ ప్రాంతాల్లో అందుబాటులో లేకపోవడం వల్ల వారి జీవన ప్రమాణాలు దిగజారుతున్నాయని తెలిపారు.
భూమి పంపిణీ, గృహ వసతి, ఉచిత వైద్యం వంటి హామీలు కాగితాలకే పరిమితమయ్యాయని అన్నారు.ఈ నేపథ్యంలో ప్రభుత్వం వెంటనే వ్యవసాయ కార్మికుల సమస్యలను పరిష్కరించాలని, కనీస వేతనాలు పెంచాలని, ఉపాధి హామీ పథకాన్ని బలోపేతం చేయాలని, ఎరువుల ధరలను తగ్గించాలని, చిన్న రైతులకు రక్షణ కల్పించే విధానాలు తీసుకురావాలని సంఘం డిమాండ్ చేసింది. సమస్యలు పరిష్కరించకపోతే రాబోయే రోజుల్లో పెద్ద ఎత్తున ఆందోళనలు చేపడతామని హెచ్చరించారు.ఈ సమావేశంలో సంఘం నాయకులు , గ్రామీణ కార్మికులు పెద్ద సంఖ్యలో పాల్గొన్నారు.
0 కామెంట్లు