- ఈ బయ్యారంలో ఎస్జీఎఫ్ అండర్–17 జాతీయ బాలుర కబడ్డీ పోటీలు
- క్రీడలతో మానసిక ఉల్లాసం పెరుగుతుంది
- మంత్రి పొంగులేటి శ్రీనివాస్ రెడ్డి
భద్రాద్రి కొత్తగూడెం జిల్లా పినపాక మండలం ఈ బయ్యారంలో నిర్వహిస్తున్న ఎస్జీఎఫ్ (SGFI) అండర్–17 జాతీయ స్థాయి బాలుర కబడ్డీ పోటీలు జిల్లాకు ప్రత్యేక గుర్తింపు తీసుకువచ్చాయి. దేశవ్యాప్తంగా వివిధ రాష్ట్రాల నుంచి వచ్చిన ప్రతిభావంతులైన క్రీడాకారులు ఈ పోటీల్లో పాల్గొని తమ నైపుణ్యాన్ని ప్రదర్శిస్తున్నారు. ఈ ప్రతిష్టాత్మక క్రీడా పోటీలను తెలంగాణ రాష్ట్ర మంత్రి పొంగులేటి శ్రీనివాస్ రెడ్డి శుక్రవారం సందర్శించారు.
ఈ సందర్భంగా క్రీడా మైదానాన్ని పరిశీలించిన మంత్రి, కబడ్డీ మ్యాచ్లను ఆసక్తిగా వీక్షించారు. అనంతరం నిర్వహించిన సమావేశంలో ఆయన మాట్లాడుతూ, క్రీడలు శారీరక ఆరోగ్యాన్ని మెరుగుపరచడమే కాకుండా మానసిక ఉల్లాసాన్ని పెంచుతాయని అన్నారు. నేటి పోటీ ప్రపంచంలో విద్యార్థులు చదువుతో పాటు క్రీడల్లోనూ ముందుండాలని సూచించారు. క్రమశిక్షణ, నాయకత్వ లక్షణాలు, సహనం వంటి గుణాలు క్రీడల ద్వారా అలవడతాయని, అవే భవిష్యత్లో జీవిత విజయానికి బాటలు వేస్తాయని తెలిపారు.
ప్రభుత్వం క్రీడల అభివృద్ధికి పెద్దపీట వేస్తోందని, గ్రామీణ ప్రాంతాల నుంచి కూడా జాతీయ, అంతర్జాతీయ స్థాయికి క్రీడాకారులు ఎదగేలా మౌలిక వసతులు కల్పిస్తున్నామని మంత్రి పేర్కొన్నారు. ఈ బయ్యారం లాంటి గ్రామీణ ప్రాంతంలో జాతీయ స్థాయి పోటీలు జరగడం స్థానిక యువతకు ప్రేరణగా నిలుస్తుందని అన్నారు. ఇలాంటి అవకాశాలను సద్వినియోగం చేసుకొని క్రీడాకారులు రాష్ట్రానికి, దేశానికి మంచి పేరు తీసుకురావాలని ఆకాంక్షించారు.
ఈ కార్యక్రమంలో భద్రాద్రి కొత్తగూడెం ఎంపీ బలరాం నాయక్ మాట్లాడుతూ, క్రీడలు యువతను తప్పుదారి నుంచి దూరంగా ఉంచి ఆరోగ్యకరమైన జీవనశైలికి అలవాటు చేస్తాయని తెలిపారు. భద్రాచలం ఎమ్మెల్యే తెల్లం వెంకటరావు క్రీడాకారులను అభినందిస్తూ, ఇటువంటి పోటీలు విద్యార్థుల్లో ఆత్మవిశ్వాసాన్ని పెంచుతాయని అన్నారు.
పినపాక ఎమ్మెల్యే పాయం వెంకటేశ్వర్లు మాట్లాడుతూ, తమ నియోజకవర్గంలో జాతీయ స్థాయి కబడ్డీ పోటీలు నిర్వహించుకోవడం గర్వకారణమని చెప్పారు. అశ్వరావుపేట ఎమ్మెల్యే జారే ఆదినారాయణ క్రీడల అభివృద్ధికి ప్రభుత్వ ప్రతినిధులంతా కలిసి పనిచేయాల్సిన అవసరం ఉందని పేర్కొన్నారు.
జిల్లా కలెక్టర్ జితేష్ వి పాటిల్ మాట్లాడుతూ, పోటీలు సజావుగా జరిగేలా అన్ని శాఖల సమన్వయంతో ఏర్పాట్లు చేసినట్లు తెలిపారు. సబ్ కలెక్టర్ మృణాల్ శ్రేష్ట, జిల్లా విద్యాశాఖాధికారి నాగలక్ష్మిలు కూడా మాట్లాడి, క్రీడాకారులకు అవసరమైన వసతులు కల్పిస్తున్నామని తెలిపారు. మొత్తంగా ఈ బయ్యారంలో జరుగుతున్న ఎస్జీఎఫ్ అండర్–17 జాతీయ బాలుర కబడ్డీ పోటీలు విజయవంతంగా కొనసాగుతుండగా, ప్రజాప్రతినిధుల సందర్శన క్రీడాకారుల్లో మరింత ఉత్సాహాన్ని నింపింది. ఈ కార్యక్రమంలో మాజీ ఎమ్మెల్యే తాటి వెంకటేశ్వర్లు, కాంగ్రెస్ పార్టీ మండల అధ్యక్షులు రామనాథం, కాంగ్రెస్ కరగూడెం మండల అధ్యక్షులు హుస్సేన్, మణుగూరు మండల అధ్యక్షులు గోపి,ఎస్జిఎఫ్ అధ్యక్షులు నరేష్, కంది చారిటబుల్ ట్రస్ట్ చైర్మన్ విశ్వభారత్ రెడ్డి, కంది సుబ్బారెడ్డి, ప్రముఖ పారిశ్రామికవేత్త రెడ్డి, మణుగూరు డిఎస్పి రవీందర్ రెడ్డి, పినపాక తహసిల్దార్ గోపాలకృష్ణ, ఎంపీడీవో సంకీర్త్, ఎంపీఓ వెంకటేశ్వర్లు, సిఐ వెంకటేశ్వర్లు, విద్యుత్ శాఖ ఏఈ వేణుగోపాల్, కాంగ్రెస్ పార్టీ సీనియర్ నాయకులు తుళ్లూరు బ్రహ్మయ్య,వివిధ శాఖల అధికారులు, ప్రజాప్రతినిధులు, క్రీడాకారులు తదితరులు పాల్గొన్నారు.
