అంధుల మహిళల T20 ప్రపంచకప్ విజేతగా భారత్ – కెప్టెన్ దీపిక టి.సి. స్ఫూర్తిదాయక వ్యాఖ్యలు
Sb న్యూస్ డెస్క్:
అంధుల మహిళల T20 ప్రపంచకప్లో నేపాల్పై ఘన విజయం సాధించి భారత్ కప్ను గెలుచుకుంది. ఈ చారిత్రాత్మక విజయానంతరం భారత జట్టు కెప్టెన్ దీపిక టి.సి. చేసిన వ్యాఖ్యలు దేశవ్యాప్తంగా హృదయాలను కదిలిస్తున్నాయి. పేదరికం, ఆకలి, వైకల్యాన్ని అధిగమించి ప్రపంచకప్ ట్రోఫీ ఎత్తిన ఆమె జీవన ప్రయాణం ప్రతి ఒక్కరికీ స్ఫూర్తిగా నిలుస్తోంది.
విజయం అనంతరం దీపిక మాట్లాడుతూ,
“ఈ విజయం మాకు అపారమైన గర్వాన్ని ఇస్తోంది. మా జట్టు ఎంత బలంగా ఉందంటే, ఇతర జట్లు మాతో ఆడటానికే భయపడుతున్నాయి. మేము ఎంతలా సిద్ధమయ్యామంటే… అవసరమైతే పురుషుల జట్టుతో కూడా ఆడటానికి రెడీ!” అని ఆత్మవిశ్వాసంతో ప్రకటించారు.
కన్నీటి గాథ – దీపిక జీవన ప్రయాణం
పేదరికం: దీపిక కర్ణాటక–ఆంధ్ర సరిహద్దులోని తంబలహళ్లి గ్రామంలో జన్మించారు. తండ్రి కూలిపని చేసి కుటుంబాన్ని పోషించేవారు.
ఆకలి: “మేము ఎంత పేదరికంలో ఉన్నామంటే… జనాలు పారేసిన కుళ్ళిన పండ్లను ఏరుకుని, పాడైన భాగాన్ని తీసేసి మిగిలినదే తిని ఆకలి తీర్చుకునేవాళ్లం” అని దీపిక గతాన్ని గుర్తు చేసుకున్నారు.
వైకల్యం: ఐదు నెలల వయసులో జరిగిన ప్రమాదంలో ఒక కంటి చూపును కోల్పోయారు. చదువు మానేయాలని బంధువులు సూచించినా వెనక్కి తగ్గలేదు. అంధుల పాఠశాలలో చదువుకుని క్రీడల్లో శిక్షణ పొంది, నేడు దేశం గర్వించే స్థాయికి ఎదిగారు.
స్ఫూర్తి సందేశం
పేదరికం, వైకల్యం అడ్డంకులు కావని, సంకల్పం ఉంటే ప్రపంచకప్ కూడా సాధ్యమేనని దీపిక నిరూపించారు. అంధుల మహిళల క్రికెట్లో భారత్ సాధించిన ఈ విజయం, క్రీడల ద్వారా సమాజంలో సమాన అవకాశాల అవసరాన్ని మరోసారి గుర్తు చేస్తోంది.
- శ్రీరామ్ బృహస్పతి , స్వాతంత్ర్య భారత్ న్యూస్ సీఈవో
