భారత రాజ్యాంగ పరిరక్షణ ధ్యేయంగా ప్రాణత్యాగం చేసి దేశ చరిత్రలో చిరస్థాయిగా నిలిచిన మాజీ ప్రధాని శ్రీమతి ఇందిరా గాంధీ సేవలు ఎప్పటికీ చిరస్మరణీయమని తెలంగాణ పీసీసీ అధ్యక్షుడు, ఎమ్మెల్సీ మహేష్ కుమార్ గౌడ్ పేర్కొన్నారు.
ఇందిరా గాంధీ జయంతి సందర్భంగా అచ్చంపేట పట్టణంలో ఏర్పాటు చేసిన కార్యక్రమంలో ఎమ్మెల్యే డాక్టర్ చిక్కుడు వంశీకృష్ణతో కలిసి ఆమె విగ్రహానికి మహేష్ గౌడ్ పూలమాలలు సమర్పించారు. అనంతరం జరిగిన సభలో ఆయన మాట్లాడుతూ—
“భారతదేశాన్ని ప్రపంచ పటంలో అగ్రస్థానంలో నిలపడానికి సాహసోపేత నిర్ణయాలు తీసుకున్న ఉక్కు మహిళ ఇందిరా గాంధీ” అని అన్నారు. బడుగు–బలహీన వర్గాల అభ్యున్నతే ఆమె ఏకైక లక్ష్యమైందని, ‘గరీబీ హటావో’ నినాదంతో దేశాన్ని పేదరిక నిర్మూలన వైపు నడిపించిందని గుర్తు చేశారు.
దేశంలో గుడిసెలు లేని గ్రామాలు చూడాలనే ఆమె కలను నిజం చేయడంలో భాగంగా సామ్రాజ్యాలను ప్రభుత్వంలో విలీనం చేయడం, ప్రైవేటు బ్యాంకులను జాతీయం చేయడం వంటి ధైర్య నిర్ణయాలు తీసుకున్నారని ఆయన ప్రశంసించారు. అంతరిక్ష రంగంలో భారత్ ముందుకు సాగడంలో ఇందిరా గాంధీ కీలక పాత్ర పోషించిందని, గుండుసూది నుంచి రాకెట్ వరకు స్వదేశీ సాంకేతికత అభివృద్ధికి ఆమె మార్గం సుగమం చేశారని చెప్పారు.
దేశ అభివృద్ధి, ప్రజల సంక్షేమం కోసం ఇందిరా గాంధీ చేసిన సేవలు, త్యాగాలు యుగయుగాల పాటు స్ఫూర్తిగా నిలుస్తాయని మహేష్ గౌడ్ పేర్కొన్నారు.
ఈ కార్యక్రమంలో స్థానిక నాయకులు, కార్యకర్తలు పాల్గొన్నారు.
Social Plugin