హైదరాబాద్లోని పంజాగుట్ట పోలీస్ స్టేషన్లో ఓ యువతి ఇచ్చిన ఫిర్యాదు మేరకు ఈ నెల 26న ఎఫ్ఐఆర్ నంబర్ 589/2026 నమోదు చేసినట్లు తెలిపారు. భారతీయ న్యాయ సంహిత (బీఎన్ఎస్)లోని సెక్షన్ 69, 351(2) కింద కేసు నమోదు చేసి పోలీసులు దర్యాప్తు కొనసాగిస్తున్నారని చెప్పారు. ఈ నేపథ్యంలో బీఆర్ఎస్ పార్టీ ఇప్పటి వరకు ఎలాంటి క్రమశిక్షణ చర్యలు తీసుకోకపోవడం పలు అనుమానాలకు తావిస్తోందని విమర్శించారు.
గతంలో మాజీ ఉప ముఖ్యమంత్రి డాక్టర్ తాటికొండ రాజయ్యపై ఆరోపణలు వచ్చిన సమయంలో పార్టీ నాయకత్వం తక్షణమే స్పందించి చర్యలు తీసుకుందని గుర్తు చేశారు. అలాగే ఇతర నాయకులపై ఆరోపణలు వచ్చిన సందర్భాల్లోనూ పార్టీ క్రమశిక్షణ చర్యలు చేపట్టిందని పేర్కొన్నారు. అదే ప్రమాణాలను రేగా కాంతారావు విషయంలో కూడా అమలు చేయాలని డిమాండ్ చేశారు.
మాజీ ముఖ్యమంత్రి కేసీఆర్ గతంలో మహిళల గౌరవానికి సంబంధించిన అంశాల్లో కఠిన నిర్ణయాలు తీసుకున్నారని, ప్రస్తుతం అదే విధమైన వైఖరి ఎందుకు కనిపించడం లేదని ప్రశ్నించారు. మహిళల భద్రత విషయంలో ఎలాంటి రాజీ ఉండకూడదని, ఆరోపణలు ఎదుర్కొంటున్న వ్యక్తి ఎవరైనా ఒకే విధమైన నిబంధనలు అమలు కావాలని అన్నారు.
చట్టపరమైన విచారణ నిష్పాక్షికంగా కొనసాగాలని, దర్యాప్తు పూర్తయ్యే వరకు సంబంధిత సంస్థలు స్వేచ్ఛగా పని చేసే అవకాశం కల్పించాలని నరేష్ కుమార్ పేర్కొన్నారు. అదే సమయంలో పార్టీ కూడా ప్రజలకు సరైన సందేశం వెళ్లేలా అవసరమైన క్రమశిక్షణ చర్యలు తీసుకోవాలని కోరారు.
ఈ అంశంపై బీఆర్ఎస్ పార్టీ వెంటనే స్పందించి తగిన నిర్ణయం తీసుకోవాలని డిమాండ్ చేసిన ఆయన, లేనిపక్షంలో మండల వ్యాప్తంగా మహిళలతో కలిసి యూత్ కాంగ్రెస్, ఎస్సీ కమిటీ ఆధ్వర్యంలో పెద్ద ఎత్తున ఆందోళన కార్యక్రమాలు నిర్వహిస్తామని హెచ్చరించారు. మహిళల గౌరవాన్ని కాపాడే విషయంలో రాజకీయాలకు అతీతంగా వ్యవహరించాలని ఆయన పిలుపునిచ్చారు.
(గమనిక: రేగా కాంతారావుపై నమోదైన కేసు ప్రస్తుతం పోలీసుల దర్యాప్తులో ఉంది. పై వార్తలోని ఆరోపణలు యూత్ కాంగ్రెస్ నాయకుడు చేసిన ప్రకటన మరియు నమోదైన కేసు వివరాల ఆధారంగా మాత్రమే ప్రచురించబడ్డాయి. కేసుపై తుది నిర్ణయం సంబంధిత న్యాయ ప్రక్రియ అనంతరం వెలువడుతుంది.)
0 కామెంట్లు